ក្រោយពេលចូលនិវត្តន៍ពី អាជីពជាកីឡាករបាល់ទាត់អស់២ឆ្នាំ លោក Patrick Vieira ពេលនេះបានចាប់ផ្ដើមប្រឡូកអាជីពជាគ្រូបង្វឹកហើយ ដោយធ្វើជាគ្រូបង្គោលនៃឈុត Reserves របស់ក្លិបមេឃខៀវ Man City (Manchester City elite development squad)។
អតីត ខ្សែបម្រើឆ្នើមនៃក្រុមជម្រើសជាតិបារាំងវ័យ៣៦ឆ្នាំរូបនេះកាន់ តំណែងជាមន្ត្រីប្រតិបត្តិផ្នែកអភិវឌ្ឍបាល់ទាត់ (football development executive) នៅ Etihad Stadium តាំងពីឆ្នាំ២០១១មក ពោលគឺបន្ទាប់ពីលេងឱ្យ Man City ក្នុងរដូវកាល២០១០-២០១១ដែលជារដូវកាលចុងក្រោយនៃអាជីពជាកីឡាករ។
ឥឡូវនេះ អតីតសមាជិកក្លិប Cannes, AC Milan, Arsenal, Juventus និង Inter Milan ត្រូវក្លិប Man City ចាត់ចែងឱ្យទទួលបន្ទុកធ្វើជាគ្រូបង្វឹកឈុតយុវជនជំនួសលោក Attilio Lombardo ក្រោយពេលលោក Roberto Mancini ដែលជាអ្នកចាត់ការឈុតធំត្រូវបានដកចេញពីតំណែងព្រមជាមួយ បុគ្គលិករបស់លោកមួយចំនួនទៀត(backroom staff )។
គ្រូបង្វឹកដែលទើបរៀនចប់វគ្គបង្វឹក UEFA B licence ក្នុងឆ្នាំ២០១២ និង ត្រៀមចូលកាន់តំណែងជាផ្លូវការនៅថ្ងៃទី០១មិថុនា ឱ្យដឹងក្រោយការផ្លាស់ប្ដូរតួនាទីនេះថា៖ “បន្ទាប់ពីចំណាយពេល២ឆ្នាំធ្វើការក្នុងផ្នែកជាច្រើនរបស់ក្លិប អមដោយការផ្ដោតជាពិសេសលើការបណ្ដុះបណ្ដាលថ្នាលយុវជនផងនោះ ខ្ញុំពិតជាមានកិត្តិយសនិងសោមនស្សខ្លាំងណាស់ដែលក្លិបផ្ដល់តួនាទី នេះមកឱ្យខ្ញុំ។ នេះជាជំពូកថ្មីនៃអាជីពរបស់ខ្ញុំក៏ដូចជាក្នុងជីវិតរបស់ខ្ញុំ។ មហិច្ឆតារបស់ខ្ញុំក្នុងការអភិវឌ្ឍយុវជនបានរីកធំឡើងៗក្នុង អំឡុងពេលខ្ញុំនៅ Man City ហើយខ្ញុំពិតជារីករាយណាស់ដែលបានដើរតួនាទីជួយសម្រួចអនាគត បាល់ទាត់ឱ្យក្លិប Manchester City”។
កាល នៅជាកីឡាករ បុរសសញ្ជាតិដើមសេណេហ្គាល់ដែលគ្រោងរៀនយក UEFA A licence ក្នុងពេលឆាប់ៗនេះ ឈ្នះជើងឯក FIFA World Cup 1998, UEFA Euro 2000, FIFA Confederations Cup 2001 ជាមួយក្រុមជម្រើសជាតិបារាំង ពានរង្វាន់ Serie A ជាមួយក្លិប AC Milan, Juventus និង Inter Milan ពានរង្វាន់ Premier League និង FA Cup ជាមួយ Arsenal និងពានរង្វាន់ FA Cup ជាមួយ Man City ក្នុងរដូវកាលចុងក្រោយនៃអាជីពរបស់ខ្លួន។ ចំពោះពានរង្វាន់ផ្ទាល់ខ្លួនវិញ Vieira ធ្លាប់ជាប់ជា Premier League Player of the Season ក្នុងរដូវកាល២០០០-០១ និងជាប់ជា French Player of the Year ក្នុងឆ្នាំ២០០១ ព្រមទាំងជាប់ក្នុង Team of the Tournament ជាច្រើនលើកផងដែរ៕
ប្រែសម្រួល៖ យ៉ុង ម៉ុងហាក់ប្រភព&រូបថត៖ eurosports
ប្រភព៖ Sabay
Post a Comment