Fairfax Finalcial Holding បានសម្រេចកិច្ចព្រមព្រៀងទិញក្រុមហ៊ុនទូរសព្ទ BlackBerry ដែលកំពុងជួបវិបត្តិក្នុងទំហំទឹកប្រាក់ ៤,៧ពាន់លានដុល្លារអាមេរិក ហើយលោក Thorsten Heins បានចុះចេញពីតំណែងជានាយកប្រតិបត្តិរបស់លោក ដោយលោក John Chen ឡើងកាន់ជំនួសជានាយកប្រតិបត្តិស្ដីទីវិញ។
លោក John S. Chen ត្រូវបានតែងតាំងជាប្រធានប្រតិបត្តិនៃក្រុមប្រឹក្សាភិបាលរបស់ BlackBerry និងជានាយកប្រតិបត្តិស្ដីទី ចំណែក Prem Watsa ត្រូវបានតែងតាំងជានាយកដឹកនាំ និងជាប្រធាននៃគណៈកម្មការសំណង និងអភិបាលកិច្ច។
លោក Thorsten Heins អតីត CEO (ឆ្វេង) លោក John Chen ជា CEO ស្ដីទីរបស់ BlackBerry
Fairfax ដែលជាក្រុមហ៊ុនហិរញ្ញវត្ថុកាណាដា ផ្ដល់សេវាកម្មធានារ៉ាប់រង និងជាម្ចាស់ហ៊ុនធំជាងគេនៅក្នុងក្រុមហ៊ុន BlackBerry នឹងចូលខ្លួនមកដឹកនាំក្រុមអ្នកវិនិយោគជាមួយឆន្ទៈក្នុងការដាក់ទុនរួមគ្នាបន្ថែម ១ពាន់លានដុល្លារដើម្បីពង្រឹង និងពង្រីកសក្ដានុភាពក្រុមហ៊ុនឡើងវិញ។ ជាពិសេស ការវិនិយោគលើកនេះ Fairfax នឹងប្រើប្រាក់ផ្ទាល់ខ្លួនចំនួន ២៥០លានដុល្លារអាមេរិក។
នាយកប្រតិបត្តិស្ដីទី លោក John Chen ជាបុគ្គលមានសមត្ថភាពមួយរូបដែលបានលើកស្ទួយក្រុមហ៊ុន Sybase របស់ខ្លួន។ លោកមានបទពិសោធន៍ទូលំទូលាយក្នុងពាណិជ្ជកម្មទូរសព្ទចល័តដែលត្រូវបានរំពឹងថា ជាធនធានមនុស្សដ៏មានតម្លៃ កម្លាំងដ៏រឹងមាំបំផុតសម្រាប់ជួយដល់ BlackBerry មុនពេលរកនាយកប្រតិបត្តិអចិន្ត្រៃយ៍មកកាន់តំណែងនេះបាន។ សព្វថ្ងៃតម្លៃហ៊ុនរបស់ BlackBerry មាន ៦,៥៥ដុល្លារក្នុងមួយហ៊ុន។
ក្នុងសេចក្ដីថ្លែងការណ៍ អ្នកស្រី Barbara Stymiest ដែលជាប្រធានក្រុមហ៊ុន BlackBerry បានថ្លែងអំណរគុណដល់លោក Thorsten Heins ដែលជាអតីតនាយកប្រតិបត្តិសម្រាប់ការរួមដៃជួយដល់ក្រុមហ៊ុនអស់រយៈពេល ៦ឆ្នាំមកនេះ ហើយក៏ស្វាគមន៍ចំពោះនាយកថ្មីលោក Chen ដែលជាបុគ្គលល្បីឈ្មោះមានបទពិសោធន៍ដឹកនាំក្រុមហ៊ុនបច្ចេកវិទ្យារួចទៅហើយនោះ។ ការចាកចេញរបស់ Heins និងការមកដល់របស់ Chen នឹងផ្លាស់ប្ដូរយុទ្ធសាស្ត្រថ្មីៗសម្រាប់ពង្រីកសក្ដានុពលក្រុមហ៊ុន៕
ប្រភព៖ SabayNews
Post a Comment