ខ្សែប្រយុទ្ធ Robin van Persie ទំនងជានៅបន្តពាក់អាវលេខ២០ដដែលនៅរដូវកាលក្រោយ ជាជាងជ្រើសយកលេខ៩របស់ក្រុមបិសាចក្រហម Manchester United ដែលកំពុងនៅទំនេរមិនទាន់មានអ្នកកាន់កាប់។
ពេល Van Persie ផ្ទេរពី Arsenal មកកាន់ Manchester United ក្នុងថ្ងៃទី១៧ខែសីហា អាវលេខ៩នៅជារបស់ខ្សែប្រយុទ្ធអន្តរជាតិប៊ុលហ្គារី Dimitar Berbatov នៅឡើយ ហេតុនេះក៏លោក Sir Alex Ferguson ឱ្យ Persie ពាក់អាវលេខ២០របស់ Fabio Da Silva បណ្ដោះអាសន្នសិនក្នុងខណៈដែល Fabio ទៅលេងឱ្យ QPR ក្នុងលក្ខខណ្ឌខ្ចីជើង១រដូវកាល។
Van Persie ក្នុងថ្ងៃបង្ហាញខ្លួនផ្លូវការជាសមាជិកក្រុម Man Utd
ប៉ុន្តែតាំងពី Berbatov ចាកចេញទៅលេងឱ្យក្រុម Fulham នាចុងខែសីហាឆ្នាំ២០១២មក អាវលេខ៩ ក៏ចាប់ផ្ដើមទំនេររហូតមកដែរ។ ការណ៍នេះធ្វើឱ្យគេរំពឹងទុកថានៅរដូវកាល២០១៣-២០១៤ ខ្សែប្រយុទ្ធជម្រើសជាតិហុល្លង់ដែលកំពុងជិតក្លាយជាម្ចាស់ស្បែកជើងមាស Premier League ជាលើកទី២ជាប់គ្នា នឹងប្ដូរពីលេខ២០ទៅពាក់លេខ៩ដែលជាលេខល្អបំផុតមួយរបស់ខ្សែប្រយុទ្ធឆ្នើម។
ផ្ទុយទៅវិញ អតីតយុវជនក្លិប Feyenoord វ័យ២៩ឆ្នាំរូបនេះបង្ហើបថានឹងនៅពាក់លេខ២០ដដែល ពីព្រោះខ្លួនមិនចង់ឱ្យអ្នកគាំទ្រខាតលុយចំណាយលើការទិញអាវថ្មីមួយទៀតទេ។ “ខ្ញុំគិតថាខ្ញុំពាក់លេខ២០ដដែល។ ខ្ញុំមានជម្រើសក្នុងការពាក់លេខ៩ ប៉ុន្តែខ្ញុំមិនគិតថាខ្ញុំនឹងជ្រើសយកលេខ៩នោះទេ ព្រោះលេខ២០នេះធ្វើឱ្យខ្ញុំសប្បាយចិត្ត។ ណាមួយ ខ្ញុំមិនចង់បង្កការលំបាកដល់អ្នកគាំទ្រដែលកំពុងពាក់អាវលេខ២០ឡើយ។ ខ្ញុំអត់ចង់ឱ្យពួកគាត់ត្រូវចំណាយលុយដើម្បីទិញអាវថ្មីមួយទៀតទេ”។ RVP បញ្ជាក់ដូច្នេះ។
ការពាក់អាវលេខ២០របស់ RVP ជាការគាប់ជួនមែនទែន ព្រោះអីរដូវកាលដំបូងរបស់គេនៅ Old Trafford គឺជារដូវកាលដែលក្រុមបិសាចក្រហមឈ្នះជើងឯកលីកកំពូលអង់គ្លេសជាលើកទី២០ក្នុងប្រវត្តិសាស្ត្ររបស់ក្លិប។ មកទល់ពេលនេះ ម្ចាស់ពានរង្វាន់កីឡាករល្អនៅ Premier League ប្រចាំខែមេសា រកគ្រាប់បាល់បាន២៥គ្រាប់ហើយ ដែលជាក្ដីសង្ឃឹមខ្ពស់ក្នុងការឈ្នះស្បែកជើងមាសម្ដងទៀត៕
តើប្រិយមិត្តចង់ឱ្យ RVP ពាក់លេខប៉ុន្មាន?
ប្រែសម្រួល៖ យ៉ុង ម៉ុងហាក់ប្រភព&រូបថត៖ dailymail
Post a Comment