ក្រុម​ការងារ​បង្កើត​ហ្គេម A Sva the Monkey
​លោក អៀ អ៊ុយ ស្ថាបនិក​ហ្គេម A Sva the Monkey បាន​និយាយ​ថា លោក​ពិត​ជា​ភ្ញាក់​ផ្អើល​មែន​ទែន នៅ​ពេល​ដែល​លោក​ទទួល​បាន​អ៊ីម៉ែល​ពី​ក្រុម​ការងារ​ Indie Game។ ពួក​គេ​បាន​​ស្នើសុំ​ឲ្យ​លោក​ដឹក​នាំ​ក្រុម​យក​ហ្គេម​នេះ​ ទៅ​តាំង​ពិព័រណ៍​នៅ​រដ្ឋ​ Los Angeles ប្រទេស​អាមេរិក នៅ​ថ្ងៃ​ទី ១១ ខែ​មិថុនា​ខាង​មុខ​នេះ។
“នេះ​ជា​លើក​ទី ១ ហើយ​ដែល​ហ្គេម​របស់​កូន​ខ្មែរ​យើង​មាន​វត្តមាន​នៅ E3 ”។ លោក​បន្ថែម។
Indie Game ជ្រើស​យក​តែ​ហ្គេម ៣០ ប៉ុណ្ណោះ​​​ពី Samsung App Store ដើម្បី​ទៅ​បង្ហាញ​ក្នុង​ឱកាស E3។ ​ក្នុង​ចំណោម​ ៣០ ហ្គេម​នេះ A Sva the Monkey ក៏​មាន​វត្តមាន​ដែរ។ ស្ថាបនិក​វ័យ​ក្មេង​រូប​នេះ​បញ្ជាក់​ថា មូលហេតុ​ដែល​ធ្វើ​ឲ្យ​ A Sva the Monkey ត្រូវ​បាន​​គេ​ទទួល​ស្គាល់​​នោះ គឺ​ដោយ​សារ​តែ​ពេល​លេង A Sva ធ្វើ​ឲ្យ​គេ​ជក់​ចិត្ត និយាយ​ឲ្យ​ចំ​គឺ​​ធ្វើ​ឲ្យ​អ្នក​លេង​សប្បាយ​នឹង​​ប្រើ​បញ្ញា​ដោះ​ស្រាយ​បញ្ហា​ក្នុង​ហ្គេម​នោះ។​
អូ! និយាយចឹង ​មាន​អ្នក​ណា​ខ្លះ​មិន​បាន​សាក​ល្បង​លេង A Sva? បើ​មិន​ទាន់ទេ សូម​ចុច​ទី​នេះ ដើម្បី​ទាញ​យក A Sva the Monkey សម្រាប់​ Android ឬ​ ចុច​ទី​នេះ សម្រាប់ iOS។
Electronic Entertainment Expo គឺ​ជា​ពិព័រណ៍​ពាណិជ្ជកម្ម​ប្រចាំ​ឆ្នាំ ដែល​មាន​តាំង​បង្ហាញ​ហ្គេម​កុំព្យូទ័រ​ និង​ឧបករណ៍​សម្រាប់​លេង​ហ្គេម​ចេញ​ថ្មី។ ​ពិព័រណ៍នេះ​រៀបចំ​ឡើង​ដោយ​សមាគម Software សម្រាប់​កម្សាន្ត (ESA) ដែល​ប្រារព្ធ​ធ្វើ​នៅ​មជ្ឈមណ្ឌល​សន្និបាត Los Angeles សហរដ្ឋអាមេរិក។ E3 ធ្វើ​ឡើង​រយៈ​ពេល ៣ ថ្ងៃ​គឺ​ចាប់​ទី​ថ្ងៃ​ទី ១១ ដល់ ១៣ ខែ​មិថុនា ខាង​មុខ​នេះ។
ចូល​រួម​អបអរ​សាទរ​ដល់​ហ្គេម​ដែល​បង្កើត​ឡើង​ដោយ​កូន​ខ្មែរ​ទាំង​អស់​គ្នា !
ប្រភព៖ Sabay