ភ្នំពេញ ៖ លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលលោកបានអំពាវនាវដល់អ្នកប្រើប្រាស់បណ្តាញទំនាក់ទំនងសង្គមFacebook ទាំងអស់ជួយធ្វើការផ្សព្វផ្សាយសារអប់រំអំពីជំងឺអេដស៍ដល់យុវជនដើម្បីឲ្យពួកគេបានយល់ដឹងការពារខ្លួនកុំឲ្យឆ្លងមេរោគអេដស៍ព្រោះថាការប្រើប្រាស់បណ្តាញទំនាក់ទំនងសង្គម (Facebook) កំពុងតែពេញនិយមក្នុងស្រទាប់យុវវ័យនាពេលបច្ចុប្បន្ន។
លោករដ្ឋមន្ត្រីបានមានប្រសាសន៍បែបនេះនៅក្នុងកិច្ចប្រជុំរៀបចំផែនការប្រតិបត្តិគ្រប់ជ្រុងជ្រោយសម្រាប់កម្មវិធីបង្ការថែទាំនិងព្យាបាលអ្នកជំងឺអេដស៍ឆ្នាំ២០១៤កាលពីថ្ងៃទី០៤ ខែវិច្ឆិកាកន្លងមកនេះដោយលោកចាត់ទុកថា បណ្តាញទំនាក់ទំនងសង្គមបាននឹងកំពុងពេញនិយមនៅកម្ពុជាដែលយុវជនយុវនារីកំពុងប្រើប្រាស់ច្រើននិងពួកគេប្រើប្រាស់រូបភាពដែលមានលក្ខណៈស្រើបស្រាលហេតុនេះយើងគួរផ្សព្វផ្សាយសារនិងរូបភាពដែលមានប្រយោជន៍ច្រើន។ លោករដ្ឋមន្ត្រីបានបន្តថា ដូច្នេះយើងគួរប្រើប្រាស់បណ្តាញនេះដើម្បីផ្សព្វផ្សាយសារអប់រំអំពីជំងឺអេដស៍តាមរយៈការប្រើប្រាស់រូបភាពដែលមានលក្ខណៈអប់រំជាជាងផ្សព្វផ្សាយរូបភាពដែលមានលក្ខណៈស្រើបស្រាល។
លោកវេជ្ជបណ្ឌិត មាន ឈីវុន នាយកមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែកនិងកាមរោគបានមានប្រសាសន៍ថា ពិតហើយការលើកទ្បើងរបស់លោករដ្ឋមន្ត្រីសុខាភិបាលពិតជាមានសារៈសំខាន់ដោយសារបណ្តាញទំនាក់ទំនងសង្គមកាន់តែមានប្រជាប្រិយភាពចំពោះយុវវ័យ ហើយគេបាននឹងកំពុងប្រើប្រាស់ប្រព័ន្ធនេះផ្សព្វផ្សាយរូបភាពខើចលើខើចក្រោមយ៉ាងច្រើន។ លោកបន្តថា ការផ្សព្វផ្សាយសារអប់រំអំពីជំងឺអេដស៍តាមបណ្តាញនេះពិតជាមានផលចំណេញ ទី១ គឺអស់ថវិកាតិច និងទី២គឺអាចផ្ញើសារទៅក្រុមយុវវ័យបានច្រើន។
លោកវេជ្ជបណ្ឌិត មាន ឈីវុន បានបន្តថា ៖“មជ្ឈមណ្ឌលជាតិបាននឹងកំពុងរៀបចំសារអប់រំអំពីជំងឺអេដស៍ដើម្បីផ្សព្វផ្សាយតាមបណ្តាញ Facebook ដើម្បីផ្តល់សារអប់រំដល់ស្រទាប់យុវវ័យឲ្យមានការយល់ដឹងពីជំងឺនេះ”។ លោកបន្តថា “ការពិតពួកគេបានយល់ដឹងច្រើនពីបញ្ហានេះហើយតាមរយៈការបញ្ចូលកម្មវិធីអប់រំសុខភាពបន្តពូជ និងសុខភាពផ្លូវភេទទៅក្នុងកម្មវិធីសិក្សានៅតាមសាលារៀនតែយុវវ័យនៅក្រៅសាលាក៏ទាមទារឲ្យមានការអប់រំច្រើនផងដែរតាមរយៈសារព័ត៌មានកាសែត វិទ្យុ ទូរទស្សន៍ជាដើម”។
លោកវេជ្ជបណ្ឌិត មាន ឈីវុន បានបន្តថា បើទោះជាបច្ចុប្បន្នយើងមិនមានតួលេខអំពីអត្រាប្រេវ៉ាទ្បង់មេរោគអេដស៍ក្នុងចំណោមយុវវ័យក្តីតែការអប់រំពួកគេត្រូវតែផ្តោតជាសំខាន់ដោយសារពួកគេជាក្រុមរវៀសរវៃនឹងការរៀនសូត្រ រវៀសរវៃជួយធ្វើការឪពុកម្តាយ និងរវៀសរវៃរកកន្លែងកំសាន្តសប្បាយផងដែរ ខណៈដែលចំនួនក្លឹបរាត្រីនានាបាននឹងកំពុងរីកដុះដាលកាន់តែច្រើន។
លោករដ្ឋមន្ត្រីបានបញ្ជាក់ថា ៖«សូមធ្វើការផ្សព្វផ្សាយអំពីគ្រោះថ្នាក់នៃមេរោគអេដស៍ ជំងឺអេដស៍ឬហេតុផលនិងរូបភាពរបស់អ្នកជំងឺអេដស៍ដែលស្គមរីងរៃតែកុំបង្ហាញមុខរបស់ពួកគេដល់សាធារណជនជាជាងប្រើប្រាស់បណ្តាញនេះដើម្បីផ្សព្វផ្សាយនូវរូបភាពដែលមានលក្ខណៈស្រើបស្រាល”។
លោករដ្ឋមន្ត្រីបានឲ្យដឹងទៀតថា ឥឡូវនេះយុវជនមានឱកាសច្រើនណាស់ក្នុងការទទួលបានព័ត៌មាន និងការផ្សព្វផ្សាយព័ត៌មាននានា ប៉ុន្តែយើងឃើញការផ្សព្វផ្សាយសារអប់រំតាមរយៈបណ្តាញទំនាក់ទំនងសង្គម(Facebook)មានចំនួនតិចនៅឡើយ។ យើងចង់ប្រើប្រាស់បណ្តាញនេះដើម្បីផ្តល់ប្រយោជន៍ដល់សង្គមជាជាងការផ្សព្វផ្សាយដែលមានលក្ខណៈស្រើបស្រាល៕
ប្រភព៖ កម្ពុជាថ្មី
Post a Comment