ភ្នំពេញ : ស្ដ្រីកូនខ្ចី និងស្រីមាន ផ្ទៃពោះ រួមទាំងកុមារតូចៗ ប្រមាណជាង២០នាក់ បានពុលដោយសារសាយ ភាយក្លិនអាម៉ូញាក់សិប្បកម្មផលិតទឹក កក យីហោ អម្រឹត ដែលមានទីតាំង ស្ថិតនៅក្នុងក្រុមទី១២ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ កាលពីព្រឹកថ្ងៃទី១០ឧសភា២០១៣ ។ |
| លោកស្រីអ៊ួង សុផល្លា (ឆ្វេង) ពេលនាំយកអំណោយទៅចែកជូនស្ដ្រីកូនខ្ចី ដែលពុលដោយសារការសាយភាយក្លិនអាម៉ូញាក់ កំពុងព្យាបាលនៅមន្ទីរពេទ្យបង្អែកសម្ដេចឪ (រូបថតៈអង្គារ៍ហេង) |
អ្នករងគ្រោះដោយសារពុល និងការសាយភាយក្លិនអាម៉ូញាក់នេះ បាននាំគ្នាទៅមន្ទីរពេទ្យបង្អែកសម្ដេចឪ ដែលស្ថិតនៅក្បែរនោះ ។
ក្រោយពេលគ្រូពេទ្យធ្វើការ ត្រួតពិនិត្យ និងឱ្យថ្នាំព្យាបាលរួចហើយ អ្នករងគ្រោះមួយចំនួនភាគច្រើនជា កុមារបាននាំគ្នាវិលត្រឡប់ទៅផ្ទះវិញ នៅសល់តែស្ដ្រីកូនខ្ចី និងស្ដ្រីមានផ្ទៃពោះ ចំនួន ៩នាក់នៅដេកព្យាបាលក្នុងពេទ្យ បង្អែកសម្ដេចឪនៅឡើយ ។
គួររំលឹកថា កាលពីយប់ថ្ងៃទី៨ ឧសភា២០១៣ មានប្រជាពលរដ្ឋ ប្រមាណជាង២០០នាក់ នាំគ្នាតវ៉ាទាម ទារសុំឱ្យអាជ្ញាធរមានសមត្ថកិច្ចបិទអាជីវកម្មសិប្បកម្ម ផលិតទឹកកកយីហោ អម្រឹត ស្ថិតបណ្ដោយផ្លូវជាតិលេខ៥ នៅក្នុងក្រុម១២ ភូមិស្ពានខ្ពស់ សង្កាត់ គីឡូម៉ែត្រលេខ៦ ខណ្ឌឫស្សីកែវនេះ ។
ក្នុងការប្ដឹងតវ៉ានោះ ប្រជាពលរដ្ឋបានចោទប្រកាន់ថា សិប្បកម្មផលិត ទឹកកកនេះបានធ្វើឱ្យធ្លាយសាយភាយ អាម៉ូញាក់ចេញមក ធ្វើឱ្យប៉ះពាល់ដល់សុខភាពពួក គាត់យ៉ាងធ្ងន់ធ្ងរ ។
ការធ្វើការតវ៉ាទាមទារឱ្យបិទ អាជីវកម្មនេះ បានធ្វើឡើងអស់រយៈ ពេលមួយម៉ោង ហើយបានធ្វើការបិទ ផ្លូវជាតិលេខ៥ រយៈពេលប្រមាណ ២០នាទី ។
ក្រោយមកលោកឃ្លាំង ហួត ជំនួយការសម្ដេចអគ្គមហាសេនាបតី តេជោហ៊ុន សែន នាយករដ្ឋមន្ដ្រីនៃព្រះ រាជាណាចក្រកម្ពុជា និងជាអភិបាលនៃគណៈអភិបាល ខណ្ឌឫស្សីកែវបានចុះ ទៅដល់កន្លែងធ្វើការតវ៉ា ដើម្បីសម្របសម្រួលជាមួយបងប្អូនប្រជាពលរដ្ឋរហូតបងប្អូនប្រជាពលរដ្ឋមានការយល់ព្រមបញ្ឈប់ធ្វើការតវ៉ា ។
សិប្បកម្មផលិតទឹកកកយីហោ អម្រឹតនេះត្រូវបានអាជ្ញាធរខណ្ឌឫស្សីកែវ បិទផ្អាកអាជីវកម្មជាបណ្ដោះអាសន្ន ភ្លាមៗដើម្បីទុកឱ្យសមត្ថកិច្ចជំនាញចុះ មកធ្វើការត្រួតពិនិត្យ ។
ព្រឹកថ្ងៃទី៩ឧសភា២០១៣ គេ បានឃើញខាងមន្ដ្រីជំនាញក្រសួង ឧស្សាហកម្មរ៉ែនិងថាមពលខាងមន្ដ្រី ជំនាញសាលារាជធានីភ្នំពេញ និងមន្ដ្រី ជំនាញខណ្ឌឫស្សីកែវចុះទៅធ្វើការ ត្រួតពិនិត្យដល់ទីតាំងសិប្បកម្មផលិត ទឹកកកមួយនេះ ។
ជាលទ្ធផលខាងជំនាញមិន ទម្លាយព័ត៌មានពាក់ព័ន្ធនឹងក្លិនសាយ ភាយជាតិអាម៉ូញាក់នេះទេ ប៉ុន្ដែខាងមន្ដ្រីជំនាញបានធ្វើជារបាយការ ណ៍ជូនទៅថ្នាក់លើ ដើម្បី ឱ្យបានជ្រាបពីបញ្ហានេះហើយ ។
ទាក់ទិននឹងករណីនេះ ប្រភព ព័ត៌មានមួយបានទម្លាយឱ្យដឹងថាការប៉ះពាល់ដោយសារការសាយភាយក្លិន អាម៉ូញាក់ចេញពីសិប្បកម្មផលិតទឹកកក មួយនេះ គឺបានធ្វើឱ្យប៉ះពាល់យ៉ាងធ្ងន់ ធ្ងរខ្លាំងណាស់ ។
ដោយសារតែការសាយភាយ ក្លិនអាម៉ូញាក់នេះហើយទើបមានប្រជា-ពលរដ្ឋប្រមាណជាង២០នាក់ពុលក្នុង នោះ មានស្ដ្រីកូនខ្ចី ស្ដ្រីមានផ្ទៃពោះ និងជាកុមារ ។
ជាមួយគ្នានេះដែរ ក្រោយពេល ទទួលព័ត៌មានថាមានប្រជាពលរដ្ឋពុលដោយសារការសាយភាយក្លិនអាម៉ូញាក់នេះ កាលពីវេលាម៉ោង១១និង១០នាទី ថ្ងៃទី១០ ឧសភា២០១៣ លោកស្រីអ៊ួង សុផល្លា ប្រធានសមាគមនារីកម្ពុជា ដើម្បីសន្ដិភាព និងអភិវឌ្ឍខណ្ឌឫស្សីកែវ រួមជាមួយសមាជិក សមាជិកាមួយចំនួនបាននាំយកអំណោយ ទៅចែកជូនប្រជាពលរដ្ឋ ដែលរងគ្រោះពុលដោយសារក្លិនអាម៉ូញាក់នេះ ។
ស្ដ្រីកូនខ្ចី និងស្ដ្រីមានផ្ទៃពោះ ចំនួន៩នាក់ ដែលកំពុងសម្រាកព្យាបាល នៅក្នុងមន្ទីរពេទ្យបង្អែកសម្ដេចឪក្នុង ម្នាក់ៗ ទទួលបានទឹកដោះគោឆៅ២យួរស្ករសមួយ គីឡូក្រាម និងថវិកា១០ម៉ឺន រៀល ។
ដោយឡែកថ្លៃព្យាបាលនៅក្នុង មន្ទីរពេទ្យត្រូវបានជួយចេញឱ្យទាំងស្រុង ។
អំណោយនិងថ្លៃព្យាបាលដែល ផ្ដល់ជូនដល់ប្រជាពលរដ្ឋរងគ្រោះ ដោយសារពុលក្លិនសាយភាយជាតិ អាម៉ូញាក់នេះ គឺជាថវិកាផ្ទាល់របស់ លោកឃ្លាំង ហួត និងលោកស្រី អ៊ួង សុផល្លា ជាភរិយា ។
ការបិទផ្អាកអាជីវកម្មសិប្បកម្មផលិតទឹកកកមួយនេះត្រូវបានអាជ្ញាធរខណ្ឌឫស្សីកែវបានបិទជាបណ្ដោះអាសន្នចាប់តាំងពីយប់ដែលមានប្រជាពលរដ្ឋតវ៉ាមកម្ល៉េះ ។
តាមប្រភពព័ត៌មានមួយបាន ទម្លាយឱ្យដឹងថា មកដល់ពេលនេះ ម្ចាស់ សិប្បកម្មនៅតែបន្ដធ្វើអាជីវកម្មផលិត ទឹកកកដដែល ទើបធ្វើឱ្យមានប្រជាពល-រដ្ឋពុលបែបនេះ ។
ឥឡូវនេះមានគេរង់ចាំមើលថា តើខាងមន្ដ្រីជំនាញក្រសួងឧស្សាហកម្ម រ៉ែ និងថាមពលមានវិធានការយ៉ាងណា ដែរចំពោះសិប្បកម្មផលិតទឹកកកមួយកន្លែងនេះ៕
អង្គារ៍ហេង
Post a Comment