ក្រុមហ៊ុនសាជីវកម្មឈានមុខគេខាងផលិតរ៉ូបូតរបស់អាមេរិក iRobot ថ្មីៗនេះបានប្រកាសថា ខ្លួននឹងផ្គត់ផ្គង់រ៉ូបូតPackBot ចំនួន ៣០ គ្រឿង សម្រាប់ចូលរួមថែរក្សាសុវត្ថិភាពក្នុងព្រឹត្តិការណ៍ប្រកួតWorld Cup 2014 នៅប្រទេសប្រេស៊ីល។
PackBot បានបំពាក់កាមេរ៉ា និងអាចបញ្ជាពីចម្ងាយផ្តល់ភាពងាយស្រួលដល់អ្នកគ្រប់គ្រងក្នុងការត្រួតពិនិត្យវត្ថុដែលសង្ស័យ ឬសកម្មភាពគំរាមកំហែងណាមួយដែលអាចកើតមានឡើង។ រ៉ូបូតនោះនឹងធ្វើការជាមួយកងសន្តិសុខជាច្រើនពាន់នាក់ទៀត ដើម្បីដើរល្បាតទីក្រុងទាំង ១២ របស់ប្រេស៊ីល ដែលមានកីឡដ្ឋានត្រូវរៀបចំការប្រកួត។
ក្នុងកិច្ចសន្យាដែលមានតម្លៃ ៧,២ លានដុល្លារអាមេរិក ក្រុមហ៊ុន iRobot ត្រូវទទួលបន្ទុកក្នុងការផ្ដល់ការជួសជុល និងថែទាំរួមការផ្គត់ផ្គង់គ្រឿងបន្លាស់ដ៏ចាំបាច់មួយចំនួនផងដែរ។ សម្រាប់ PackBot ក្នុងមួយគ្រឿងមានតម្លៃពី ១ សែនទៅ ២ សែនដុល្លារអាមេរិក។
ដើម្បីធានាឲ្យដំណើរការណ៍ការប្រកួត World Cup 2014 ប្រព្រឹត្តិទៅបានរលូន ប្រេស៊ីលបានចំណាយទឹកប្រាក់ប្រមាណ ៩០០ លានដុល្លារលើបញ្ហាសន្តិសុខ តាមរយៈការទិញគ្រឿងបរិក្ខារត្រួតពិនិត្យ ជាពិសេសយន្តហោះឈ្លបយកការណ៍ទំនើបពីអ៊ីស្រាអែល សម្រាប់ព្រឹត្តិការណ៍ដ៏សំខាន់បំផុតមួយនោះ។
ប្រភព៖ Sabay
Post a Comment