Gameloft ថ្មីៗនេះបានបង្ហើបឱ្យដឹងពីហ្គេមចេញថ្មីរបស់ខ្លួនមួយទៀត បន្ទាប់ពីជំនាន់ Asphalt 7 គឺ Asphalt 8 ដែលនឹងចេញឱ្យលេងនៅលើ iOS និង Android នៅពេលឆាប់ៗខាងមុខនេះ។
ក្រុមហ៊ុនបារាំងជំនាញខាងបង្កើតហ្គេម Gameloft បង្ហាញជំនាន់ Asphalt ថ្មីគឺ Asphalt 8: Airborne ជាមួយរូបភាពដែលជាឈុតនៅក្នុងការប្រណាំងឡានយ៉ាងស្វិតស្វាញ។ ការបង្ហើបឱ្យដឹងជាបណ្ដើរៗមុននេះ ធ្វើឡើងស្របពេលដែលក្រុមហ៊ុនបានចេញហ្គេមថ្មី Gangstar Vegas ដាក់ឱ្យទាញយកបាននៅលើ App Store និងបង្ហើបហ្គេមថ្មីមួយទៀតឈ្មោះ Modern Combat 5។
ស៊េរី Asphalt ជាប្រភេទហ្គេមប្រណាំងឡាន ដែលអ្នកលេងអាចលេងបានយ៉ាងជក់ចិត្ត ដោយការប្រកួតប្រជែងត្រូវប្រើយុទ្ធសាស្ត្រ ព្រមទាំងតិចនិកក្នុងការផ្ដួលដៃគូប្រកួតដោយបុកកម្ទេចដើម្បីយកល្បឿនឱ្យកាន់តែលឿន។ មិនតែប៉ុណ្ណោះ Asphalt មានគុណភាពក្រាហ្វិករូបភ្លឺច្បាស់ ជាមួយទេសភាពយ៉ាងស្រស់ត្រកាលតាមវគ្គប្រណាំង ដែលធ្វើឱ្យអ្នកលេងទទួលបានអារម្មណ៍ហាក់ខ្លួនឯងកំពុងស្ថិតនៅក្នុងការប្រណាំងពិតៗអីចឹងដែរ។
ជាមួយគ្នានេះ Asphalt 8: Airborne នឹងមានផែនទីថ្មីចំនួន ៨ បន្ថែម ហើយនឹងមានឡានកាន់តែទំនើបដូចជា Lamborghini, Bugatti, Zonda, Ferrari, Mercedes និងក្រុមហ៊ុនឡានល្បីៗជាច្រើនទៀត។ ហ្គេមប្រណាំងឡានថ្មីនេះនឹងចូលខ្លួនមកបម្រើចំណីអារម្មណ៍អ្នកលេងដែលប្រើ Smart Device ដំណើរការដោយប្រព័ន្ធប្រតិបត្តិការទូរសព្ទចំនួន២ គឺ iOS និង Android ឆាប់ៗខាងមុខនេះ ចន្លោះពីខែ (មិថុនា-សីហា) ជាមួយតម្លៃ ៩៩សេន។ តោះទៅមើលវីដេអូតិចមើល៍ Asphalt 8 មានឡានទំនើបៗ និងវគ្គថ្មីៗអីខ្លះ៖
ប្រភព៖ Sabay
Post a Comment