ប្រជាជនប្រេស៊ីលប្រមាណជាង ១លាននាក់បានចូលរួមធ្វើបាតុកម្មនៅទីក្រុងជាង ១០០ ទូទាំងប្រទេសគិតត្រឹមថ្ងៃម្សិលមិញ។
បាតុកម្មបានផ្ទុះឡើងជាងមួយសប្ដាហ៍មកហើយ។ បាតុករចង់ឱ្យរដ្ឋាភិបាលកាត់បន្ថយថ្លៃសេវាឡានក្រុង អំពើពុករលួយ បង្កើនសេវាសាធារណៈ (អប់រំ និងសុខាភិបាល) និងកាត់បន្ថយការចំណាយដ៏ច្រើនលើសលប់លើការរៀបចំកីឡាបាល់ទាត់ពិភពលោកនៅឆ្នាំក្រោយ។
បាតុកម្មកន្លងទៅ មានយុវតីវ័យ ១៨ឆ្នាំម្នាក់បានស្លាប់ និងមនុស្សជាច្រើននាក់រងរបួស។ ប៉ូលិសបានបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រក្នុងពេលបង្ក្រាបបាតុករ។ ទោះជាជាមានការបង្ក្រាបយ៉ាងនេះក្ដី ក៏កម្លាំងបាតុករនៅតែប្រមូលផ្ដុំគ្នាបន្តធ្វើបាតុកម្ម ជាពិសេសនៅតាមដងផ្លូវ។
នៅទីក្រុង Rio de Janeiro មួយប៉ុណ្ណោះ មានបាតុករប្រហែល ៣សែននាក់បានផ្ទុះកំហឹងតវ៉ា ក្នុងនោះមានមនុស្សប្រហែល ៤០នាក់បានរងរបួស។
ប្រធានាធិបតីប្រេស៊ីល លោកស្ត្រី Dilma Rousseff បានកោះប្រជុំគណៈរដ្ឋមន្ត្រីជាបន្ទាន់កាលពីម្សិលមិញបន្ទាប់ពីនៅស្ងប់ស្ងាត់មួយរយៈ។ លោកស្ត្រីបានសន្យាថា នឹងបើកការចរចាជាមួយសមាជិកក្រុមអ្នកតវ៉ា ហើយលោកស្ត្រីក៏បានថ្លែងផងដែរថា លោកស្ត្រីនឹងចាត់វិធានការគ្រប់បែបយ៉ាងដើម្បីថែរក្សាសណ្ដាប់ធ្នាប់នៅក្នុងប្រទេស។
ជាមួយគ្នានេះ ក៏មានការអំពាវនាវតាមបណ្ដាញសង្គម និងតាមរយៈសារអេឡិចត្រូនិកជាច្រើនផងដែរដើម្បីធ្វើបាតុកម្មមួយទៀតនៅសប្ដាហ៍ក្រោយនេះ
ប្រភព៖ Sabay
Post a Comment