ប្លែកមិនគួរឲ្យជឿ គឺពេលនេះ ប្រទេសកម្ពុជាចាប់ផ្ដើមមានអ៊ីនធឺណិត Wi Fi បំពាក់លើរ៉ឺម៉កកង់បី ដឹកភ្ញៀវបណ្ដើរ ភ្ញៀវអាចប្រើប្រាស់អ៊ីនធឺណិតបណ្ដើរបានយ៉ាងងាយស្រួល នៅរាជធានីភ្នំពេញ។
រ៉ឺម៉កកង់បី ដែលមានបំពាក់ Wi-Fi ដំបូងគេនៅរាជធានីភ្នំពេញនេះ គឺរបស់លោក ខឹម សុខុន រៀបចំ និងឧបត្ថម្ភដោយក្រុមហ៊ុន Excell។
លោក ខឹម សុខុន ថ្លែងថា៖ “រ៉ឺម៉កកង់បីខ្ញុំមានបំពាក់សេវាអ៊ីនធឺណិត Wi Fi សម្រាប់បម្រើដល់អតិថិជនដោយឥតគិតថ្លៃ”។ ម៉ាស៊ីន ដែលផ្ដល់សេវាអ៊ីនធឺណិតនោះ មានលក្ខណៈដូចទូរសព្ទអីចឹងដែរ គឺសាកថ្មហើយ បំពាក់លើរ៉ឺម៉កកងបីនោះជាការស្រេច។ ភ្ញៀវគ្រាន់តែយកទូរសព្ទ iPad ឬកុំព្យូទ័រមកបើកប្រើ គឺមានអ៊ីនធឺណិតតែម្ដង”។
លោក ខឹម សុខុន បន្ថែមថា គោលបំណងដែលលោកបំពាក់អ៊ីនធឺណិតឡើង គឺដោយសារចង់ឲ្យអតិថិជនរបស់គាត់អាចប្រើប្រាស់សេវាអ៊ីនធឺណិតបាន ព្រោះថាភ្ញៀវរបស់គាត់ភាគច្រើនជាជនបរទេស។ អតិថិជនរបស់គាត់អាចភ្ជាប់ប្រើប្រាស់សេវានេះខណៈពេលកំពុងជិះ ឬចុះដើរឆ្ងាយពីម៉ាស៊ីនរហូតដល់ជិត១០ម៉ែត្រ ក៏នៅតែមានសេវាដែរ។
ក្រោយពីបំពាក់នូវសេវាកម្មនេះហើយ លោក ខឹម សុខុន កត់សម្គាល់ឃើញថា រ៉ឺម៉កកង់បីរបស់គាត់ដូចជាមានអតិថិជនមកជិះច្រើនជាងមុន ជាពិសេសគឺក្រុមហ៊ុនឯកជននានាជួលកាន់តែច្រើន។
លោកបានប្រាប់ទៀតថា៖ “អតិថិជនរបស់គាត់ភាគច្រើនមានការសប្បាយរីករាយ និងបានសរសើរពីសេវាកម្មរបស់គាត់ខ្លាំងណាស់ ព្រោះទន្ទឹមនឹងការធ្វើដំណើរតាមរ៉ឺម៉កកង់បីរបស់គាត់ហើយ ពួកគេអាចប្រើប្រាស់អ៊ីនធឺណិតដោយឥតគិតថ្លៃទៀតផង។ ពិតជាពិសេសមែន!”។
ប្រភព៖ Sabay
Post a Comment