អតីតកីឡាករជម្រើសជាតិបារាំង Zinedine Zidane អាចក្លាយជាគ្រូបង្វឹកថ្មីនៃក្រុម Real Madrid ជំនួសតំណែងលោកJose Mourinho ដែលបានផ្លាស់ទៅដឹកនាំ Chelsea ទៅហើយនោះ។ លោក Florentino Perez ប្រធានក្លិបយក្សរបស់អេស្ប៉ាញមួយនេះ បានបង្ហើបឲ្យដឹងថា Zidane អាចជាបេក្ខភាពមួយ ប៉ុន្តែលោកក៏បានបញ្ជាក់ដែរថា ក្លិបមិនប្រញាប់ប្រញាល់តែងតាំងគ្រូថ្មីឡើយ។
ក្រោយពេលលោក Mourinho ចាកចេញពីកៅអីដ៏ក្ដៅនៅ Bernabeu ទៅ Stamford Bridge សាជាថ្មីតាំងពីថ្ងៃចន្ទកន្លងទៅ បានធ្វើឲ្យលេចចេញនូវសំនួរថាក្លិបនេះនឹងតែងតាំងគ្រូណាជំនួសវិញ? ពាក្យចចាមអារ៉ាមមុនគេដែលលេចឡើង គឺថាគ្រូបង្វឹក Paris Saint Germain លោក Carlo Ancelotti ជាបុគ្គលទំនងជាងគេ ប៉ុន្តែក្លិបជើងឯកបារាំង បានបង្ហាញក្ដីរំពឹងថា គ្រូបង្វឹកសញ្ជាតិអ៊ីតាលីរូបនោះ នឹងបន្តនៅដល់ចប់កុងត្រា។
Zidane ដែលបានព្យួរស្បែកជើងកាលពីឆ្នាំ២០០៦នោះ មិនបានទៅណាឆ្ងាយពី Real Madrid ឡើយ ពោលគឺនៅមានតួនាទីមួយចំនួនក្នុងក្លិបរហូតដល់បច្ចុប្បន្ន ដូចជាតួនាទីគ្រូបង្វឹកឈុតយុវជនជាដើម។ លោក Perez បានបញ្ជាក់នៅក្នុងកិច្ចសម្ភាសន៍ក្នុងទូរទស្សន៍មួយរបស់អេស្ប៉ាញកាលពីថ្ងៃអង្គារថា Zidane អាចធ្វើជាគ្រូបង្វឹក Real Madrid បាន ដោយសារអតីតខ្សែប្រយុទ្ធរូបនោះ មានគ្រប់តាមអ្វីដែលក្លិបចង់បាន។ ប្រធានក្លិបវ័យ៦៦ឆ្នាំ ក៏មិនបានបង្ហាញបេក្ខភាពណាផ្សេងទៀតដែរ។
សម្រាប់ប្រិយមិត្តវិញ គិតថា Zidane សក្ដិសមធ្វើជាគ្រូបង្វឹក Real Madrid ឬអត់? ចុះក្រៅពី Zidane មានបេក្ខភាពណាផ្សេងទៀត ដែលប្រិយមិត្តគិតថាអាចជំនួសកៅអីលោក Mourinho បាន?
ប្រភព៖ Sabay
Post a Comment