នេះជាស្នាដៃថ្មីមួយបន្ថែមទៀត ដែលកើតចេញពីគំនិតច្នៃប្រឌិត របស់កូនខ្មែរមួយរូប ជាអតីតសាស្ត្រាចារ្យរូបវិទ្យា និងគណិតវិទ្យា។នោះគឺ លោក គង់ ផារិទ្ធិ ជាប្រធានអង្គការអ្នកកសាងសមត្ថភាព ដែលបានច្នៃប្រឌិតបង្កើតទូកប្រើប្រាស់ថាមពលពន្លឺព្រះអាទិត្យនេះឡើង។
ដើមឡើយ លោក គង់ ផារិទ្ធិ ក៏ធ្លាប់បង្កើតរថយន្ត និងកង់ប្រើប្រាស់ថាមពលពន្លឺព្រះអាទិត្យដំបូងគេនៅកម្ពុជាប្រកបដោយជោគជ័យផងដែរ។
លោក គង់ ផារិទ្ធិ បានឲ្យដឹងថា មុខនឹងលោកកែច្នៃទូកប្រើប្រាស់ថាមពលពន្លឺព្រះអាទិត្យនេះ ចេញជារូបរាង លោកបានចំណាយប្រមាណ ៣ ទៅ៤ ខែ ក្រោមការរចនាម៉ូដ ពីកូនប្រុសរបស់លោក ដែលមានវ័យ ១៧ ឆ្នាំ។
លោកបានបន្តថា ចំពោះទូកប្រើប្រាស់ថាមពលព្រះអាទិត្យនេះ គឺលោកបានប្រើប្រាស់ទូកខ្យល់ជាផលិតផលពីក្រៅប្រទេស ស្លាបចក្រ កញ្ចក់ស្រូបពន្លឺព្រះអាទិត្យ ម៉ូទ័រ អាគុយនិងcharge controller(ឧបករណ៍សាកភ្លើងហើយបិទ ដោយខ្លួនឯងមិនឲ្យខូចអាគុយ) ។ លោកបានបន្ថែមថា៖ “ទូកនេះអាចរត់បាន ក្នុងល្បឿន ២០ ទៅ៣០ គីឡូម៉ែត្រ ក្នុងមួយម៉ោង និងអាចជិះបានគ្នាពី៣ទៅ៤ នាក់”។
លោក គង់ ផារិទ្ធិ បានឲ្យដឹងទៀតថា សម្រាប់ទូកប្រើប្រាស់ថាមពលពន្លឺព្រះអាទិត្យ ដែលលោកបានច្នៃប្រឌិត និងទើបដាក់ឲ្យដំណើរការសាកល្បងនេះ គឺបានចំណាយថវិកាជិត ២៦០០ ដុល្លារ ដែលនេះគឺជាការចំណាយច្រើនគួរសម ព្រោះវត្ថុធាតុដើមទាំងអស់សុទ្ធសឹងនាំចូលពីក្រៅប្រទេស ជាពិសេសគឺកញ្ចក់ស្រូបពន្លឺព្រះអាទិត្យ ចំនួន ២បន្ទះ ដែលមួយបន្ទះមានខ្នាត២០០វ៉ាត់ ថ្លៃជាង ៦០០ដុល្លារ។
លោក គង់ ផារិទ្ធិ បានបង្ហាញពីចំណាប់អារម្មណ៍ ការដែលលោកមានគំនិតច្នៃប្រឌិតបង្កើតទូកប្រើប្រាស់ថាមពលពន្លឺព្រះអាទិត្យនេះឡើង ដោយសារក្នុងក្របខណ្ឌពិភពលោកទាំងមូលក៏ដូចជាប្រទេសកម្ពុជាពីមួយឆ្នាំទៅមួយឆ្នាំកាន់តែមានការប្រែប្រួលអាកាសធាតុ ដោយសារការបញ្ចេញនូវថាមពលកខ្វក់ទៅលើបរិយាកាស ធ្វើឲ្យប៉ះពាល់ដល់បរិស្ថាន។ដូច្នេះចង់មិនចង់ការប្រើប្រាស់ថាមពលពន្លឺព្រះអាទិត្យគឺការរួចចំណែកមួយ ក្នុងការទប់ស្កាត់ផលប៉ះពាល់ដល់បរិស្ថានផងដែរ។
លោកបានបន្ថែមថា មិនត្រឹមប៉ុណ្ណឹង អង្គការអ្នកកសាងសមត្ថភាព ក៏មានការច្នៃប្រឌិតប្រើប្រាស់កញ្ចក់ស្រូបពន្លឺព្រះអាទិត្យ ដើម្បីបម្រើ ក្នុងវិស័យកសិកម្ម និងក្នុងឧស្សាហ៍កម្មមួយចំនួនផងដែរ។ក្នុងនោះមានម៉ូទ័របូមទឹកប្រើប្រាស់ថាមពលពន្លឺព្រះអាទិត្យ មូបទឹកស្រោចស្រពផលដំណាំរបស់ប្រជាកសិករ និងប្រើប្រាស់ថាមពលពន្លឺព្រះអាទិត្យ ដើម្បីសាកអាគុយជាដើម។
លោកបានចាត់ទុកថាការប្រើប្រាស់ថាមពលពន្លឺព្រះអាទិត្យមកបម្រើ ក្នុងវិស័យជាច្រើននេះគឺជាគំរូអាជីវកម្មថ្មីមួយ ផ្តល់ផលចំណេញច្រើន បើប្រៀបធៀបទៅនឹងការប្រើប្រាស់ថាមពល ដោយប្រេងឥន្ធៈ ព្រមទាំងបានរួមចំណែកការពារដល់បរិស្ថានផងដែរ។
ប្រភព៖ Sabay
Post a Comment